Azər Niftiyev: İrəvandan gələn mesaj yeni reallıqların qəbuludur

Jurnalist və siyasi şərhçi Azər Niftiyev Ermənistanda keçirilən parlament seçkilərinin ilkin nəticələrini şərh edib.

Citypost.az xəbər verir ki, Azər Niftiyev sosial şəbəkədə paylaşdığı yazıda bildirib ki, yayılan “exit-poll” nəticələri təsdiqlənərsə, bu, təkcə Ermənistanın Baş naziri Nikol Paşinyanın növbəti seçki qələbəsi deyil, həm də Ermənistan cəmiyyətində son illərdə baş verən siyasi və ictimai transformasiyanın göstəricisi olacaq.

Azər Niftiyevin sözlərinə görə, ilkin nəticələrə əsasən Paşinyanın rəhbərlik etdiyi Vətəndaş Müqaviləsi Partiyası səslərin 56,7 faizini toplayaraq açıq üstünlük əldə edib və bu nəticə təsdiqlənərsə, hökuməti təkbaşına formalaşdırmaq imkanı qazanacaq.

Siyasi şərhçi hesab edir ki, nəticələrin əsas səbəblərindən biri Ermənistan cəmiyyətində uzun illər formalaşdırılmış siyasi miflərin və qeyri-real geosiyasi təsəvvürlərin təsirini itirməsidir.

Onun fikrincə, erməni siyasi düşüncəsində uzun müddət yer alan “dənizdən dənizə Ermənistan” ideyası nə iqtisadi inkişaf, nə də təhlükəsizlik təmin edə bilib. Əksinə, bu yanaşma Ermənistanın regional layihələrdən kənarda qalmasına və sosial-iqtisadi problemlərinin dərinləşməsinə səbəb olub.

Azər Niftiyev qeyd edib ki, 2020-ci ildən sonra regionda yaranan yeni geosiyasi reallıqlar Ermənistan cəmiyyətini seçim qarşısında qoyub. O bildirib ki, seçicilərin əhəmiyyətli hissəsi keçmişin illüziyalarına deyil, reallıqların qəbuluna üstünlük verib.

Həmçinin oxuyun

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Şərhçi vurğulayıb ki, Azərbaycanın həyata keçirdiyi siyasət və Prezident İlham Əliyevin nümayiş etdirdiyi ardıcıl strateji xətt regionda yeni siyasi gündəmin formalaşmasında mühüm rol oynayıb. Onun sözlərinə görə, Azərbaycanın ərazi bütövlüyünün bərpası ilə nəticələnən proseslər Cənubi Qafqazda uzun illər mövcud olmuş status-kvonu dəyişdirərək bütün regional aktorları yeni reallıqları nəzərə almağa məcbur edib.

Azər Niftiyev hesab edir ki, Ermənistan cəmiyyətinin böyük hissəsi artıq qonşularla qarşıdurma üzərində qurulan ideologiyanın ölkəyə inkişaf və rifah gətirmədiyini anlayır. O, Paşinyanın mümkün qələbəsini seçicilərin emosional şüarlardan daha çox sabitlik, təhlükəsizlik və iqtisadi inkişaf vədlərinə üstünlük verməsinin göstəricisi kimi qiymətləndirib.

Siyasi şərhçinin fikrincə, seçkilərin nəticələri təsdiqlənərsə, bu, erməni cəmiyyətində reallıq siyasətinin utopik düşüncələr üzərində üstünlük qazandığını göstərən növbəti siyasi mesaj kimi tarixə düşəcək. O vurğulayıb ki, Cənubi Qafqazın gələcəyi revanşizm deyil, əməkdaşlıq, iqtisadi inteqrasiya və regional sabitlik üzərində qurulmalıdır.

Yusif