Anadangəlmə ürək qüsurları hər yaşda aşkarlana bilər  

Mütəxəssislər bildirirlər ki, anadangəlmə ürək qüsurları yalnız uşaqlıq dövrünün problemi deyil. Bu qüsurlar bəzi hallarda körpəlik və ya gənclik yaşlarında müəyyən edilsə də, bəzən uzun illər gizli qalaraq orta və ya hətta daha irəli yaşlarda aşkarlana bilir. Gec diaqnoz qoyulan hallarda isə xəstəlik artıq müəyyən fəsadlarla özünü göstərə bilər.

Citypost.az xəbər verir ki, həkimlərin sözlərinə görə, son illərdə aparılan müayinələr zamanı uşaqlıq dövründə aşkar edilməmiş bəzi anadangəlmə ürək qüsurları yetkin yaşlarda müəyyən olunur. Bu xəstələrdə əsas şikayətlər adətən təngnəfəslik, tez yorulma, ürəkdöyünmə, fiziki aktivliyin azalması və bəzən də ürək çatışmazlığı əlamətləri olur.

Mütəxəssislər qeyd edirlər ki, son əməliyyat edilən xəstələrdən biri 30 yaşlı qadın olub. Ona qulaqcıqlararası çəpər qüsuru və ağciyər arteriyasının ciddi daralması diaqnozu qoyulub. Digər xəstə isə 41 yaşlı kişi olub və onda parsial venoz dönüş anomaliyası, həmçinin qulaqcıqlararası çəpərin sinus-venoz tip qüsuru aşkarlanıb.

Hər iki pasiyentdə ağciyər təzyiqinin yüksək olması müşahidə edildiyindən, əməliyyatdan əvvəl ilkin mərhələdə tibbi müalicə aparılıb. Xəstələrin vəziyyəti yenidən qiymətləndirildikdən sonra onların cərrahi müdaxiləyə uyğun olduğu müəyyən edilib və əməliyyat həyata keçirilib. Həkimlərin məlumatına görə, hər iki əməliyyat uğurla başa çatıb və xəstələrin vəziyyəti qənaətbəxş olub.

Kardiocərrahlar vurğulayırlar ki, anadangəlmə ürək qüsurlarının erkən aşkarlanması son dərəcə vacibdir. Müasir tibbin imkanları sayəsində bu qüsurlar artıq hamiləlik dövründə, dölün ana bətnində olduğu vaxt fetal exokardioqrafiya vasitəsilə müəyyən edilə bilir. Körpə dünyaya gəldikdən sonra isə transtorakal exokardioqrafiya müayinəsi ürəyin quruluşunu və funksiyalarını ətraflı qiymətləndirməyə imkan verir.

Mütəxəssislərin sözlərinə görə, son illərdə doğum evlərində və uşaq xəstəxanalarında aparılan rutin exokardioqrafik müayinələr nəticəsində gecikmiş anadangəlmə ürək qüsurlarının sayı əhəmiyyətli dərəcədə azalmağa başlayıb. Bu isə minlərlə uşağın vaxtında diaqnoz almasına və müalicə olunmasına şərait yaradır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Həkimlər bildirirlər ki, erkən diaqnoz qoyulan anadangəlmə ürək qüsurlarının böyük hissəsi uğurla müalicə olunur və xəstələrin normal həyat sürməsi mümkün olur. Əksinə, uzun müddət aşkarlanmayan qüsurlar ürək çatışmazlığı, ağciyər hipertenziyası və digər ciddi fəsadlara səbəb ola bilər.

Məhz buna görə mütəxəssislər valideynlərə hamiləlik dövründə tövsiyə olunan bütün müayinələrdən keçməyi, uşaqlarda isə ürəklə bağlı hər hansı şübhəli əlamət olduqda vaxt itirmədən kardioloqa müraciət etməyi məsləhət görürlər.

Həkimlərin vurğuladığı kimi, erkən diaqnostika yalnız xəstəliyin vaxtında aşkarlanması deyil, həm də həyatın xilas edilməsi deməkdir. Anadangəlmə ürək qüsurlarında vaxtında qoyulan diaqnoz gələcək sağlamlığın ən vacib təminatlarından biridir.

Yusif