Sıx süd vəzi toxuması nə deməkdir? – Mütəxəssis açıqladı

Son illər süd vəzi xərçənginin erkən aşkarlanması məqsədilə aparılan müayinələrə maraq əhəmiyyətli dərəcədə artıb. Bununla yanaşı, mammoqrafiya, süd vəzi ultrasəs müayinəsi (USM), maqnit-rezonans tomoqrafiyası (MRT), süd vəzisində aşkarlanan kistlər və sıx süd vəzi toxuması ilə bağlı cəmiyyətdə müxtəlif suallar və yanlış fikirlər də formalaşıb. Mütəxəssislər bildirirlər ki, düzgün seçilmiş müayinə proqramı xəstəliyin erkən mərhələdə aşkarlanması və uğurlu müalicəsi üçün ən vacib amillərdən biridir.

Citypost.az xəbər verir ki, həkimlər bildirib ki, son 10-15 il ərzində süd vəzi müayinələrinə başlama yaşı əvvəlki illərlə müqayisədə daha aşağı salınıb. Bunun əsas səbəbi gənc yaşlarda süd vəzi xəstəliklərinin və bəzi hallarda süd vəzi xərçənginin daha erkən yaşlarda müşahidə edilməsidir. Bu səbəbdən ailəsində süd vəzi və ya yumurtalıq xərçəngi olan, genetik risk daşıyan və ya digər risk faktorlarına malik qadınlar üçün müayinə proqramı fərdi şəkildə hazırlanmalıdır.Yüksək risk qrupuna daxil olan qadınlarda müəyyən hallarda iki ildən bir kontrast maddə ilə süd vəzi MRT müayinəsinin aparılması tövsiyə edilir. O vurğulayıb ki, pasiyenti hansı həkimin müayinə etməsindən asılı olmayaraq, risk qrupunda olan şəxslər üçün müəyyən olunmuş müayinə proqramına ciddi əməl edilməlidir.

Həkimlər qeyd edib ki, süd vəzi müayinəsində ultrasəs və mammoqrafiya bir-birini əvəz edən deyil, tamamlayan diaqnostik üsullardır. Gənc qadınlarda süd vəzi toxuması daha sıx olduğundan ultrasəs müayinəsi daha informativ nəticə verir. Xüsusilə kistlərin, fibroadenomaların və digər xoşxassəli dəyişikliklərin qiymətləndirilməsində USM üstünlük təşkil edir. Yaş artdıqca isə mammoqrafiyanın diaqnostik əhəmiyyəti yüksəlir.Süd vəzisində aşkarlanan çoxsaylı kistlərlə bağlı narahatlıqlara da aydınlıq gətirilib. Həkim bildirib ki, pasiyentlər bəzən "əvvəllər 7 kistim var idi, indi 15 olub" deyə ciddi narahatlıq keçirirlər. Halbuki təkcə kistlərin sayının çox olması təhlükə anlamına gəlmir. Əsas məsələ onların quruluşu, ölçüsü və xarakteridir. Sadə kistlər tamamilə xoşxassəli hesab olunur, xərçəng riskini artırmır və əksər hallarda yalnız müşahidə tələb edir.

Mütəxəssislər mammoqrafiya cavablarında tez-tez rast gəlinən "Tip C" və "Tip D" sıx süd vəzi toxuması ifadələrini də izah edib. Onun sözlərinə görə, bu ifadələr süd vəzi toxumasında vəzili toxumanın piy toxumasından daha çox olduğunu göstərir. Belə hallarda mammoqrafiyanın həssaslığı müəyyən qədər azalır və görüntülərdə bəzi dəyişiklikləri aşkar etmək çətinləşə bilər. Bu səbəbdən sıx süd vəzi toxuması olan qadınlarda əlavə olaraq ultrasəs və ya MRT müayinəsinin aparılması tövsiyə oluna bilər.

Həkimlər cəmiyyətdə geniş yayılan "mammoqrafiyanın radiasiyası süd vəzi xərçəngi yaradır" fikrinin tamamilə əsassız olduğunu da bildirib. Onun sözlərinə görə, mammoqrafiya zamanı alınan radiasiya dozası olduqca aşağıdır və insan sağlamlığı üçün təhlükəli hesab edilmir. Hətta bir mammoqrafiya zamanı alınan radiasiya təxminən bir saatlıq təyyarə uçuşu zamanı insanın aldığı təbii radiasiya ilə müqayisə oluna bilər. Buna görə də radiasiyadan qorxaraq müayinədən imtina etmək düzgün yanaşma deyil.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Mütəxəssislər sosial şəbəkələrdə yayılan digər yanlış məlumatlara da münasibət bildirib. Onun sözlərinə görə, yanlış seçilmiş alt paltarının süd vəzi xərçəngi yaratdığı barədə iddiaların elmi əsası yoxdur. Alt paltarının düzgün seçilməsi rahatlıq baxımından vacib olsa da, onun xərçəngin yaranmasına səbəb olduğunu təsdiqləyən elmi sübut mövcud deyil. Xoşxassəli süd vəzi törəmələrinin hamısı gələcəkdə xərçəngə çevrilmir. Lakin bəzi xüsusi dəyişikliklərdə risk müəyyən qədər yüksək ola bilər. Buna görə də aşkarlanan hər bir törəmə mütəxəssis tərəfindən qiymətləndirilməli, lazım gəldikdə əlavə müayinələr və biopsiya aparılmalıdır.

Sonda həkimlər bütün qadınlara çağırış edərək bildirib ki, süd vəzi xəstəliklərinin qarşısının alınmasının ən effektiv yolu vaxtında profilaktik müayinələrdən keçməkdir. Onun sözlərinə görə, yaşa və risk faktorlarına uyğun aparılan mammoqrafiya, ultrasəs və MRT müayinələri süd vəzi xərçənginin erkən mərhələdə aşkarlanmasına imkan verir. Erkən diaqnoz isə müalicənin uğurlu nəticələnməsi və həyatın xilas olunması baxımından ən mühüm şərtdir.