Qeydiyyatda olan qohum evin satışına mane ola bilərmi?

Daşınmaz əmlakla bağlı ailədaxili mübahisələr Azərbaycanda ən çox rast gəlinən hüquqi problemlərdən biridir. Xüsusilə ev sahibinin mənzili satmaq istəməsi, lakin həmin ünvanda qeydiyyatda olan qohumların buna etiraz etməsi tez-tez mübahisələrə səbəb olur. Mütəxəssislər bildirirlər ki, belə hallarda əsas məsələ mülkiyyət hüququ ilə yaşayış yeri üzrə qeydiyyat anlayışlarının bir-birindən düzgün fərqləndirilməsidir.

Citypost.az xəbər verir ki, vətəndaşlardan biri müraciətində bildirib ki, mənzil tamamilə onun mülkiyyətindədir və çıxarış da onun adınadır. Lakin qaynanası və ailə quran baldızı həmin evdə qeydiyyatda olduqları üçün mənzilin satılmasına mane olurlar. Müraciət müəllifini maraqlandıran əsas sual isə budur: ev sahibi mənzili satmaq üçün onların razılığını almalıdırmı?

Hüquq sahəsində çalışan mütəxəssislər bildirirlər ki, əgər daşınmaz əmlakın yeganə qanuni sahibi bir şəxsdirsə, həmin əmlak üzərində sərəncam vermək hüququ da yalnız ona məxsusdur. Qeydiyyatda olmaq isə şəxsi avtomatik olaraq evin ortaq sahibi etmir və ona mülkiyyət hüququ qazandırmır.Bununla yanaşı, ekspertlər qeyd edirlər ki, mənzildə qeydiyyatda olan şəxslərin mövcudluğu alqı-satqı prosesində müəyyən hüquqi və praktiki çətinliklər yarada bilər. Buna görə də əmlakın satılmasından əvvəl həmin şəxslərin qeydiyyatdan çıxarılması məqsədəuyğun hesab olunur.

Mütəxəssislərin sözlərinə görə, əgər qeydiyyatda olan şəxs faktiki olaraq həmin ünvanda yaşamırsa, başqa ailə qurub və daimi yaşayış yeri dəyişibsə, bu hal onun qeydiyyatdan çıxarılması üçün hüquqi əsas hesab edilə bilər. Belə vəziyyətlərdə mülkiyyətçi əvvəlcə könüllü şəkildə qeydiyyatdan çıxarılmasını təklif edə, razılıq əldə olunmadıqda isə məhkəməyə müraciət edə bilər.

Ekspertlər bildirirlər ki, məhkəmə işə baxarkən şəxsin həqiqətən həmin ünvanda yaşayıb-yaşamadığını, başqa yaşayış yerinin olub-olmadığını və digər sübutları araşdırır. Faktiki yaşayışın olmadığı müəyyən edilərsə, məhkəmə həmin şəxsin qeydiyyatdan çıxarılması barədə qərar qəbul edə bilər.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Hüquqşünaslar xüsusilə vurğulayırlar ki, qeydiyyat hüququ ilə mülkiyyət hüququ tamamilə fərqli hüquqi anlayışlardır. Mənzildə qeydiyyatda olmaq evə sahib olmaq demək deyil. Əgər şəxsin mənzildə payı və ya mülkiyyət hüququ yoxdursa, o, yalnız qeydiyyatda olduğu üçün evin satılmasına hüquqi baxımdan mane ola bilməz.

Mütəxəssislərin fikrincə, qeydiyyat məsələsi qanuni qaydada həll edildikdən sonra mülkiyyətçi öz əmlakı ilə bağlı istənilən qərarı sərbəst qəbul edə bilər. O, mənzili sata, bağışlaya, hədiyyə edə və ya başqa şəxsə özgəninkiləşdirə bilər. Bunun üçün qeydiyyatda olmuş qohumların razılığı tələb olunmur.

Ekspertlər vətəndaşlara tövsiyə edirlər ki, bu cür hallarda şifahi mübahisələrə və ailədaxili gərginliyə üstünlük vermək əvəzinə, hüquqi prosedurlardan istifadə etsinlər. Əmlakla bağlı yaranan mübahisələrin qanun çərçivəsində həll edilməsi həm tərəflərin hüquqlarının qorunmasına, həm də gələcəkdə yarana biləcək əlavə problemlərin qarşısının alınmasına xidmət edir.

Yeganə