Radioloqu yandıran şüa - Qurban Yaquboğlu yazır..

Milli Onkologiya Mərkəzinin həkimi, nəhayət, vəfat etdi. "Nəhayət" sözü ötən qeyri-müəyyən zaman kəsimində acı təəssüfü ifadə eləməkdən ötrü ortadadı. Eyni zamanda aprelin 30-da baş vermiş müdhiş hadisənin - pis bir "ilk"in 6 gün sonra son nöqtəyə çatışını bildirir.

Tək bizdə yox, bütün dünyada hələ də ən çarəsiz diaqnozların qoyulduğu bir ünvan sayılan onkoloji xəstəxanada törədilmiş olayın sanki unudulmaqda olan özəti yenidən gündəmə gəldi. Təfərrüat? Yox, bu dəfə təfərrüata varmaq imkan xaricindədi. 

Xəstəxanaya gəlib qumbarayla özünü və həkimi partladan Mübariz (bu, Azərbaycanda sevilən adlardandı) kimdi, nəçidi, doğrudanmı qazidi, Qarabağa müharibəsinin 1-cisində, yoxsa 2-cisində iştirak edib və edibmi? Bilmirik. 

Mübarizi qumbaraya əl atmağa məcbur edən qəzəbin motivi barədə də rəsmi və ya qeyri-rəsmi heç bir növdən tutarlı məlumatımız yoxdu.

Nə edək? Elə hadisələr var, orda var yoxdan çox-çox az olur.

Sosial şəbəkədə həkim-radioloqun ölümünə təəssüflənən nə qədər statusa, şərhə rast gəlinir, nadir mütəxəssislərdəndi deyilir. 

Yeri gəlmişkən, əcəba, bizim tibb təhsilimiz doğrudanmı hansısa sahədə kadr yetrişdirməkdə bu qədər acizdi; o qədər aciz ki, hadisəyə acıyanların əsas arqumenti məhz budu: nadir mütəxəssis imiş!

Burda cavabı, necə deyərlər, "əlaqədar təşkilatlar"ın öhdəsinə buraxaq, hərçənd onlar cavab verməsələr də inciyən deyilik. Çünki cavab verilməyəciyini bəri başdan təxmin edə bilirik.

Bir şey işıq kimi aydındı, nə həkim, nə pasiyent xəstəxanaya ölməyə və ödürməyə gəlmir. Əksinə, yaşamağa və yaşatmağa gəlirlər! Amma bu dəfə tam əksinə, ikisi də palatada öldü. Sadə və məlum məntiqlə ən bəd halda onlardan biri, yəni pasiyent ölməli, həkim sağ qalmalıydı.

Yenə həmin sadə və məlum məntiqlə pasiyent "həkimin əlində" ölə bilərdi. Yenə tərsinə! 

Heç bilmək olurmu ki, bu dəfə kim kimi öldürüb, birinci "atəş" nə zaman, hansı şəraitdə açılıb?..

Pasiyentlə həkimin ölümü arasında zaman məsafəsi (6 gün!) nə qədər uzansa da, onları səbəb-nəticə zəncirindən qoparıb aralamaq mümkün olmur ki olmur.

İnsanlar çarəsiz diaqnoza dözürlər, çarəsiz durumu zor-xoş qəbul edirlər - axırı ölmək deyil?! Ədalətsizliyə, haqsızlığa tab gətirmək çətindi. Şeytan çarxını fırladan da budu.

Qurban Yaquboğlu

Jurnalist, yazıçı

Həmçinin oxuyun

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Şahin Qurbanov da soyadını dəyişir?...