Qapaq qoyulan diş niyə ağrıyır? – Stomatoloqlar əsas səbəbləri açıqlayırlar

Dişə qapaq qoyulduqdan sonra müəyyən müddət keçdikdən sonra həmin dişdə ağrı və narahatlıq yaranması pasiyentlərin ən çox rastlaşdığı problemlərdən biridir. Bir çox insan hesab edir ki, qapaq qoyulduqdan sonra dişlə bağlı bütün problemlər aradan qalxmalıdır. Lakin həkimlər bildirirlər ki, qapağın altında yaranan ağrı heç də normal hal hesab olunmur və mütləq araşdırılmalıdır.

Citypost.az xəbər verir ki, stomatoloqların sözlərinə görə, düzgün hazırlanmış və peşəkar şəkildə yerləşdirilmiş qapağın altında ağrı olmamalıdır. Əgər müəyyən müddətdən sonra ağrı başlayırsa, bu, ağız boşluğunda və ya həmin dişdə hansısa problemin mövcudluğundan xəbər verir.

Mütəxəssislər bildirirlər ki, qapaq altında ağrının ən çox rast gəlinən səbəblərindən biri kanal müalicəsinin tam aparılmamasıdır. Bəzi dişlərdə iki, üç, hətta dörd kanal ola bilər. Əgər həmin kanallardan biri tam təmizlənməyibsə və sinir toxumasının bir hissəsi qalarsa, zaman keçdikcə iltihab yaranaraq ağrıya səbəb ola bilər.Digər səbəb isə diş kökü ətrafında yaranan iltihabi prosesdir. Həkimlər qeyd edirlər ki, bəzən qapaq qoyulan zaman heç bir problem görünməsə də, sonradan kök nahiyəsində infeksiya və ya iltihab inkişaf edə bilər. Tibb dilində periodontit adlandırılan bu vəziyyət xüsusilə dişə basarkən və ya çeynəmə zamanı ağrı ilə özünü göstərir.

Stomatoloqlar diqqətə çatdırırlar ki, ağrının səbəbi hər zaman kanal problemi olmur. Bəzən qapağın hazırlanması zamanı dişləmənin hündürlüyü düzgün hesablanmır. Bu zaman qapaq digər dişlərdən bir qədər yüksək qalır və çeynəmə zamanı bütün yük həmin dişin üzərinə düşür. Nəticədə diş daim təzyiq altında qaldığı üçün ağrı yaranır.

Mütəxəssislərin sözlərinə görə, bəzi hallarda isə problem protez konstruksiyasının düzgün planlaşdırılmaması ilə bağlı olur. Əgər dişlərin sayı, çeynəmə yükü və ağız boşluğunun biomekanikası düzgün qiymətləndirilməzsə, qapaq normaldan artıq yüklənir. Uzun müddət davam edən bu artıq yük həm ağrıya, həm də gələcəkdə diş kökü və ətraf toxumalarda ciddi problemlərin yaranmasına səbəb ola bilər.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Həkimlər bildirirlər ki, qapaq qoyulduqdan sonra yaranan ağrını ağrıkəsicilərlə gizlətmək düzgün yanaşma deyil. Çünki problemin səbəbi aradan qaldırılmadıqca ağrılar təkrarlanacaq və vəziyyət daha da ağırlaşa bilər.

Mütəxəssislər tövsiyə edirlər ki, qapaq qoyulan dişdə davamlı ağrı, dişləmə zamanı narahatlıq, şişkinlik, qızartı və ya çeynəmə çətinliyi yaranarsa, vaxt itirmədən stomatoloqa müraciət edilməlidir. Rentgen və digər müayinələr vasitəsilə problemin dəqiq səbəbi müəyyənləşdirildikdən sonra uyğun müalicə aparılmalıdır.

Həkimlərin fikrincə, düzgün diaqnostika, keyfiyyətli kanal müalicəsi və peşəkar hazırlanmış qapaq həm dişin uzunömürlü olmasını təmin edir, həm də gələcəkdə yarana biləcək ağrı və ağırlaşmaların qarşısını alır.

Yeganə