Süd vəzisində ağrı yoxdursa, xərçəng ola bilməz? – Mütəxəssislər təsəvvürləri açıqlayır

Süd vəzi xəstəlikləri ilə bağlı cəmiyyətdə çoxsaylı yanlış təsəvvürlər mövcuddur. Bu yanlış məlumatlar bəzən qadınların həkimə gec müraciət etməsinə, nəticədə isə xəstəliyin daha gec mərhələdə aşkarlanmasına səbəb olur. Mütəxəssislər bildirirlər ki, süd vəzi xərçəngi erkən mərhələdə aşkar edilərsə, müalicə imkanları və sağalma ehtimalı xeyli yüksək olur. Buna görə də insanlar sosial şəbəkələrdə yayılan yanlış məlumatlara deyil, həkim məsləhətlərinə etibar etməlidirlər.

Citypost.az xəbər verir ki, onkoloqların sözlərinə görə, pasiyentlərin ən çox verdiyi suallardan biri biopsiya ilə bağlıdır. Bir çox insan hesab edir ki, biopsiya zamanı şişə toxunmaq xəstəliyin orqanizmə yayılmasına səbəb olur. Halbuki bu fikir tamamilə yanlışdır.

Mütəxəssislər bildirirlər ki, biopsiya süd vəzisində olan törəmənin xoşxassəli, yoxsa bədxassəli olduğunu müəyyən etmək üçün aparılan ən etibarlı diaqnostik üsullardan biridir. Müasir tibbdə istifadə olunan biopsiya metodları təhlükəsiz hesab olunur və elmi araşdırmalar göstərir ki, biopsiya aparılması xərçəng hüceyrələrinin yayılmasına səbəb olmur. Əksinə, düzgün diaqnoz qoyulması üçün biopsiya əksər hallarda vacib mərhələdir.Digər geniş yayılmış yanlış təsəvvür isə süd vəzi xərçənginin mütləq ağrı verməsi ilə bağlıdır. Həkimlər vurğulayırlar ki, süd vəzi xərçəngi əksər hallarda erkən mərhələdə heç bir ağrı yaratmır. Xəstələrin əksəriyyəti yalnız süd vəzisində və ya qoltuqaltı nahiyədə kiçik düyün hiss etdikdən sonra müayinəyə müraciət edirlər.Ağrının olmaması heç də xəstəliyin olmadığı anlamına gəlmir. Əksinə, süd vəzi xərçəngi çox vaxt səssiz inkişaf edir və ağrı daha çox xəstəliyin irəliləmiş mərhələlərində meydana çıxa bilər. Buna görə də qadınlar yalnız ağrı hiss etdikdə deyil, profilaktik məqsədlə də mütəmadi müayinədən keçməlidirlər.Pasiyentlərin tez-tez verdiyi digər suallardan biri isə süd vəzisində aşkarlanan düyünlərin dərman vasitəsilə yox olub-olmamasıdır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Mütəxəssislərin sözlərinə görə, fibroadenoma kimi xoşxassəli törəmələr əksər hallarda dərman vasitəsilə aradan qalxmır. Belə düyünlərin müalicə taktikası onların ölçüsündən, böyümə dinamikasından və xəstənin ümumi vəziyyətindən asılı olaraq müəyyən edilir. Bəzi hallarda sadəcə müşahidə kifayət edir, bəzi hallarda isə cərrahi müdaxilə tələb oluna bilər.Həkimlər xəbərdarlıq edirlər ki, süd vəzisində hiss edilən hər hansı düyünü, forma dəyişikliyini, dəri çəkilməsini, məmə ucundan ifrazatı və ya digər dəyişiklikləri diqqətdən kənarda qoymaq olmaz. Bu əlamətlər mütləq həkim tərəfindən qiymətləndirilməlidir.Mütəxəssislər bütün qadınlara yaşlarından asılı olaraq süd vəzilərini mütəmadi yoxlamağı, profilaktik müayinələrdən keçməyi və hər hansı şübhəli əlamət müşahidə etdikdə vaxt itirmədən həkimə müraciət etməyi tövsiyə edirlər. Erkən diaqnostika süd vəzi xərçəngi ilə mübarizədə ən güclü silahlardan biri hesab olunur.

Yeganə