Dermatoloqlar sızanaqların əsl səbəblərini açıqladı

Dəridə yaranan sızanaqlar, səpkilər və digər dəyişikliklər insanların ən çox narahat olduğu sağlamlıq problemlərindən biridir. Xüsusilə üz nahiyəsində yaranan akne həm estetik narahatlıq yaradır, həm də bir çox hallarda insanların müxtəlif yanlış məlumatlara inanmasına səbəb olur. Uzun illərdir cəmiyyətdə dolaşan fikirlərdən biri də sızanaqların "qurd xəstəliyi" ilə əlaqəli olmasıdır. Lakin mütəxəssislər bildirirlər ki, bu iddianın elmi əsası yoxdur.

Citypost.az xəbər verir ki, həkimlərin sözlərinə görə, dərinin ən böyük üstünlüyü onun orqanizmdə baş verən dəyişiklikləri ilk göstərən orqanlardan biri olmasıdır. Digər daxili orqanlarda yaranan problemlər uzun müddət gizli qala bildiyi halda, dəridə baş verən ən kiçik dəyişiklik belə insanın diqqətini dərhal cəlb edir.

Mütəxəssislər qeyd edirlər ki, mədə, qaraciyər və ya digər daxili orqanlarda baş verən dəyişikliklər yalnız xüsusi müayinələr zamanı aşkarlanır. Dəri isə orqanizmin bir növ güzgüsü rolunu oynayır. Məhz buna görə də insanlar ilk növbədə dermatoloqa müraciət edirlər və bir çox daxili xəstəliklərin ilkin əlamətləri də məhz dəri dəyişiklikləri vasitəsilə müəyyən edilə bilir.

Həkimlər bildirirlər ki, illərdir cəmiyyətdə formalaşmış "sızanağın səbəbi qurddur" fikri köhnə yanaşmalardan qaynaqlanır və müasir tibbdə öz təsdiqini tapmayıb.

"Vaxtilə demək olar ki, bir çox dəri problemlərinin səbəbi bağırsaq qurdları ilə əlaqələndirilirdi. Lakin bu günə qədər aparılmış elmi araşdırmalar göstərir ki, akne xəstəliyi ilə bağırsaq parazitləri arasında birbaşa əlaqə yoxdur. Bu fikir elmi cəhətdən sübut edilməyib və artıq mif hesab olunur", – deyə mütəxəssislər bildirirlər.

Dermatoloqların sözlərinə görə, əlbəttə ki, bəzi parazitar xəstəliklər orqanizmdə müxtəlif problemlər yarada bilər. Lakin söhbət məhz akne və yeniyetmə sızanaqlarından gedirsə, burada əsas səbəblər tamamilə fərqlidir.

Mütəxəssislər qeyd edirlər ki, hazırda aknenin yaranmasında əsas rol oynayan üç əsas faktor elmi şəkildə sübut olunub.

Bunlardan birincisi genetik meyillikdir. Əgər valideynlərdə və ya yaxın qohumlarda ağır akne müşahidə olunubsa, həmin şəxsdə də bu problemin yaranma ehtimalı daha yüksək olur.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

İkinci əsas səbəb hormonal dəyişikliklərdir. Xüsusilə yeniyetməlik dövründə, hamiləlik zamanı və ya qadınlarda hormonal balansın pozulması fonunda yağ vəzilərinin fəaliyyəti artır və nəticədə sızanaqlar əmələ gəlir.

Üçüncü mühüm amil isə qlisemik indeksi yüksək olan qidaların həddindən artıq istifadəsidir. Şəkərli məhsullar, şirniyyatlar, ağ undan hazırlanan qidalar və sürətli karbohidratlarla zəngin qidalar bəzi insanlarda aknenin şiddətlənməsinə səbəb ola bilər.

Həkimlər vurğulayırlar ki, bu üç faktor hazırda aknenin yaranmasında elmi cəhətdən sübut olunmuş əsas səbəblər hesab edilir.

"Bəlkə gələcəkdə aparılacaq yeni tədqiqatlar başqa səbəbləri də ortaya çıxaracaq. Elm daim inkişaf edir. Amma bu gün üçün təsdiqini tapmış əsas səbəblər genetik meyillik, hormonal dəyişikliklər və yüksək qlisemik indeksli qidalanmadır. Əksinə, sızanaqların bağırsaq qurdları ilə əlaqəli olması barədə fikir isə artıq elmi araşdırmalar tərəfindən təsdiqlənməyib", – deyə mütəxəssislər bildirirlər.

Dermatoloqlar sonda vətəndaşlara tövsiyə edirlər ki, üzdə yaranan sızanaqları xalq arasında dolaşan miflərlə deyil, müasir tibbin sübut etdiyi məlumatlarla qiymətləndirsinlər. Uzun müddət davam edən və ya ağırlaşan akne hallarında vaxt itirmədən dermatoloqa müraciət etmək həm dəridə qalıcı izlərin qarşısını alır, həm də problemin əsl səbəbinin müəyyən edilərək düzgün müalicə olunmasına imkan verir.

Yusif