Şəhərin qarmaqarışıq vətəndaşları: Şişdən tutmuş metroya və “lisenziyasız gözəlliyə” qədər 

Yay fəslidir, amma bizimkıların “hərarəti” havadan daha yüksəkdir. Yardımlıda bir vətəndaş çayın soyuq gəlməyini “milli faciə” kimi qəbul edib, əlinə keçən şişi manqalda qızdırıb arvadına “dağ” basır. Şiş, bax, belə bir alətdir: kabab bişirmək üçün də istifadə olunur, arvad-uşaq “tərbiyələndirmək” üçün də. Məhkəmə də çox təəccüblənib, sanki Yardımlı dağlarında şişlə "işgüzar münasibətlər" qurulmasının yeni hüquqi presedent olduğunu bilmirmiş kimi.

Həmin vaxt Hacıqabulda da başqa bir “ailə məhkəməsi” qapıdadır. Qayınata kürəkəni odun parçasıyla elə bir “tərbiyə” edib ki, hüquqşünaslar da, məhkəmə də məsələnin belə tez “barışıqla” həll olunmasına mat qalıb. Görünür, bizim cəmiyyətdə qanunvericilik bir yana, "odun və şiş konstitusiyası" daha sürətli işləyir.

 Amma paytaxt Bakıya gələndə hava bir qədər də ağırlaşır. Küçədə gecələyən yaşlı qadının “üç övladı var” xəbəri sosial şəbəkələri silkələyir. Görəsən, o üç övladın anasını küçəyə qoymaq üçün hansı ürək, hansı vicdan lazımdır? Yoxsa onlar da özləri üçün "soyuq çay" bəhanəsi axtarırlar? Bəlkə də, heç bəhanəyə də ehtiyac yoxdur – sadəcə, insanlıq artıq gündəlik həyatın bir parçası olmaqdan çıxıb, "lazımsız yük" kimi kənara atılıb.

 Hələ bu azmış kimi, Bakıda "gözəllik də qurban tələb edir" prinsiri ilə işləyən lisenziyasız kosmetoloji mərkəzlər üzə çıxır. Sən demə, paytaxtın ortasında hansısa mərkəz heç bir kağız-kuğuz, lisenziya tanımadan xalqa “gözəllik bəxş edirmiş”. İnsanlarımızın üzünə elə “kosmetik” toxunurlar ki, adamın ya üzü qalır, ya da cəriməsi. Yardımlıda ər arvadın dərisini şişlə “düzəldir”, Bakıda isə kosmetoloqlar lisenziyasız iynə-dərmanla. Ferma, sex, yoxsa salon – fərqi yoxdur, əsas odur ki, qanunsuzluq üçün hər yerdə bol şərait var.

 Və bütün bu “yük”ün üstünə metronun da əhalini xərcə salması gəlir. “Nizami” ilə “28 May” arasındakı 11 aylıq fasilə, o əlavə 60 qəpiklik avtobuslar... Ekspertlər “qəza riski azalsın”, “müasir standartlar olsun” deyə izahat verirlər. Əlbəttə, hər şey vətəndaşın rifahı üçün! Amma vətəndaşın rifahı həmin o 60 qəpiklərin yığılmasından keçirsə, gələcəkdə bəlkə də, metroya girmək üçün də "şiş istiliyi" qədər əzab çəkməli olacağıq.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Yardımlıda şiş, Hacıqabulda odun, Bakı küçələrində çarəsizlik, lisenziyasız kosmetoloji "möcüzələr" və metroda qəpik-qəpik hesablanan gələcək... Biz necə bir zamanda yaşayırıq? Bəlkə, bütün bu hadisələr bir-birindən xəbərsiz deyil? Bəlkə, şişin qızdığı manqaldan çıxan tüstü bütün ölkəni bürüyüb, gözümüzü kor edib, ürəyimizi daşlaşdırıb?

 Allah sonumuzu xeyir eləsin, amma görünən budur ki, hələ uzun müddət "soyuq çay" içəcəyik – həm məcazi, həm də əsl mənada.

 Şəmsi Qoca