Fazil Mustafa: Dövlətə qarşı ideoloji təhdidlər artır

Milli Məclisin deputatı Fazil Mustafa bildirib ki, Azərbaycan dövlətinə bağlı olan, onun bayrağını sevən və dövlətin varlığını uca tutan hər kəs üçün bu mesajlar aydındır. Onun sözlərinə görə, dövlət kənardan idarə olunan informasiya hücumlarına məruz qalır və belə bir şəraitdə dövləti və onun dəyərlərini müdafiə etməmək doğru yanaşma deyil.

Deputat qeyd edib ki, başqa ölkələrin dini ideologiyasının təbliğatçıları cəmiyyətin bir hissəsinə təsir göstərə, bəzi insanlar isə öz rahat həyat tərzini pozmamaq üçün dövlət vəzifəsində olsalar belə, dövlət maraqlarını qorumaqdan yayına bilərlər. O bildirib ki, bəzi şəxslər qaragüruhçu zehniyyət qarşısında milli diplomlarının, ziyalı adlarının və mandatlarının arxasında gizlənə bilər. Fazil Mustafanın sözlərinə görə, onlar bunu bacarmayacaqlar, çünki dövlətin varlığını qorumaq və millətin adını ucaltmaq kimi bir missiyaları var.

O vurğulayıb ki, Azərbaycan Respublikasının hüdudlarında keçirilən istənilən elmi konfransda, beynəlxalq tədbirdə və idman yarışında Azərbaycanın Dövlət Himni səslənməli, üçrəngli Dövlət Bayrağına hörmət göstərilməli, Azərbaycanın azadlığı uğrunda şəhid olmuş insanların xatirəsi anılmalı, İslam dininin müqəddəs kitabı və onun barış mesajları baş tacı edilməli, Azərbaycanın milli havaları ilə meydana çıxmaq şərəf hesab olunmalıdır.

Deputat bildirib ki, günümüzün reallığı və ailə ənənələri baxımından hər kəs İslam dininin özünün qəbul etdiyi məzhəbini, təriqətini və ya dini baxışını şəxsi həyatında yaşaya bilər. Onun sözlərinə görə, hər kəs xaricdəki şeyxinə, siyasi və ya digər avtoritetlərə bağlı ola, başqa dinə mənsubiyyətini, hətta dinsizliyini belə bu ölkədə sərbəst şəkildə yaşaya bilər. Lakin o hesab edir ki, bunların ictimai-siyasi mühitə ideologiya kimi gətirilməsinə və dünyəvi dövlət prinsiplərinin pozulmasına imkan verilməməlidir.

Fazil Mustafa diqqətə çatdırıb ki, harada dünyəvi dövlət mövcuddursa, orada insanlar dinlərini də daha səmimi yaşayırlar. Onun fikrincə, harada istər xristian, istər islam, istər yəhudi, istərsə də buddist dini düşüncəsi hakim ideologiyaya çevrilirsə, orada inanc zorakılığı və din üzərindən mənasız qarşıdurmalar geniş yayılır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Deputat bildirib ki, bu tendensiyanın qarşısı alınmasa, dini-teokratik düşüncə Azərbaycan Xalq Cümhuriyyətinin ideallarını sıradan çıxara və Azərbaycanı ətrafındakı geriçi cəmiyyətlərə çevirə bilər. O qeyd edib ki, cəmiyyət ətraf ölkələrdə baş verən prosesləri, həmin cəmiyyətlərin hansı problemlərlə üzləşdiyini və bu ideoloji "virusun" necə yayıldığını görməli və hiss etməlidir.

Fazil Mustafa vurğulayıb ki, tək qalsa belə, bu millət və bu dövlət üçün faydalı hesab etdiyi fikirləri söyləməyə və yazmağa davam edəcək. O bildirib ki, bu fikirlərin eşidilib-eşidilməməsinin onun üçün fərqi yoxdur və xatırladıb ki, XIX əsrin tənha cəngavərləri – Mirzə Fətəli Axundzadə, Seyid Əzim Şirvani, Həsən bəy Zərdabi də öz dövrlərində geniş şəkildə eşidilmirdilər.

Deputat qeyd edib ki, bu gün göz bəbəyi olan Azərbaycan Xalq Cümhuriyyəti ideallarını yalnız ağasının məzarını ziyarət etməyi həyat məqsədi sayan insanlar deyil, az sayda olsa da, həmin tənha cəngavərləri anlayan və onları dəstəkləyən məsuliyyətli düşüncə adamları qurublar. Onun sözlərinə görə, bu gün də təəssüf ki, həmin düşüncə ilə əks baxışlar arasında mübarizə davam edir və cəmiyyət buna çox vaxt səssiz qalır.

Sonda Fazil Mustafa bildirib ki, yenə də vətən xainlərinin şəbəkəsi bütün imkanları ilə dövlətə qarşı fəaliyyət göstərir. Onun sözlərinə görə, dövlətin imkanlarından istifadə edən bəzi şəxslər isə bu təhlükələr qarşısında susmağa üstünlük verirlər. Deputat əmin olduğunu bildirib ki, yaxın gələcəkdə bu təhlükə ilə bağlı xəbərdarlıqların mahiyyəti daha yaxşı başa düşüləcək.