Orxan Saffari: Azərbaycanın tanınmayan Xalq yazıçısı

Azərbaycan Xalq yazıçısı, şairi deyəndə ağıla gələn ilk adlar Sabir Rüstəmxanlı, Anar, Ramiz Rövşən və s. kimi adlar olur. 

Ancaq heç yazıçıların da yadına düşməyən bir Xalq yazıçısı isə Natiq Rəsulzadədir. 

Sözün həqiqi mənasında bu gün bir çox yazıçı-şairin tanımadığı Xalq yazıçısıdır o. 

Diqqət etmişəm, məşhur Xalq yazıçı və şairləri də onunla oturub-durmurlar. Sosial şəbəkədə birlikdə şəkilləri olan Xalq yazıçısı və şairlərin şəkillərinin heç birində Natiq Rəsulzadə yoxdur. Heç tədbirlərdə də iştirak etmir. Görəsən, səbəb nədir?

Natiq Rəsulzadə əsasən rus dilli yazıçıdır. 

Niyə? Bilinmir. Yəni belə Azərbaycanca da gözəl danışır. Ən azından Çingiz Abdullayev kimi deyil. Səlis nitqi var. Ara-sıra verilişlərdə də görmüşəm. Allaha min şükür, danışa bilir. 

Onun haqqında məlumatlarda belə bir söhbət yer alır:

40 ilə yaxındır ki, əsərləri bir çox dillərdə və dünyanın adlı-sanlı ölkələrində çap olunur. 

Görünür, bizimkilərin çoxunun dünya ilə nəsə ciddi problemi var. Adama deyərlər, Natiq Rəsulzadəni az qala məhəllərində güclə tanıyalar, o dəqiqə niyə dünyaya çıxdı? 

Elə bil, “dünyada tanınır” ifadəsi bir növ son ümiddir.

Proses, deyəsən, belə olur:

-Azərbaycanda tanımırlar?

-Yox.

-Problem deyil. Yaz. Əsərləri dünyanın bir çox ölkələrində çap olunub.

Ümumiyyətlə, dünyanı bu qədər urvatdan salmağın adı nədir?

Deyilənə görə, Natiq Rəsulzadənin ABŞ-də, Rusiyada da kitabları çap olunur.

Bax belə yerdə şair yaxşı deyib ki, anan ölsün, ay Tramp, yiyəsiz qal, ay Putin. 

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Sözsüz, Azərbaycanda tanınmayan Xalq yazıçısı Macarıstan, Yuqoslaviya, Polşa və başqa ölkələrdə də çap olunub. 

Üstəlik, o da deyilir ki, əsərləri bir çox nüfuzlu milli və beynəlxalq ədəbi mükafatlara layiq görülüb.

Nə vaxt, necə? Biz cəhənnəm, heç olmasa, özünün xəbəri varmı? Bu mükafatlar haqqında niyə heç yerdə heç bir məlumat yoxdur? Mükafatı niyə şərləyirlər?

Çingiz Abdullayev 200-dən çox romanın müəllifidirsə, Natiq Rəsulzadə 200-dən çox hekayənin, 50-dən artıq da kitabın müəllifidir. 

50 kitabı qoyuram bir qırağa. Elə lap Çingiz Abdullayevin qara qaşına, gözünə qurban olsun. Bəs o 200 hekayənin cəmi birini kim bilir?

Uzun axtarışlardan sonra sosial şəbəkələrdə bir-iki hekayəsinə rast gəldim. Məsələn, “Pəncərə” adlı bir hekayəsi var. Əgər yerdə qalan 199 hekayə də o cürdürsə, day hessat. 

Natiq Rəsulzadənin fəaliyyəti bununla da yekunlaşmır. 

Onun yazdıqları əsasında olduqca mənasız, maraqsız, təkcə film heyətinin sonradan cəmi bir dəfə baxdığı filmlər çəkilib. 

Başqa sözlə, kitabları necə oxunmursa, filmlərinə də elə baxmırlar. 

Ancaq maraqlıdır ki, o, bu adı necə alıb? Hansı xidmətlərinə görə? Təqdimatını kim və niyə yazıb? 

Xalqın əli kitablı şəxsləri də Xalq yazıçısını tanımırsa, bu, faciə deyilmi?

Şübhəsiz, bir yazıçının kütləvi olaraq tanınmamağı sənət üçün meyar deyil. Hətta əksərən ciddi işlərlə məşğul olan adamlar kütlə arasında tanınmırlar da. Lakin Azərbaycan kimi balaca bir ölkənin ədəbiyyatında böyük bir ada - Xalq yazıçısı adına sahib olan adam tanınmırsa, bu, birmənalı olaraq problemdir.!

Orxan Saffari