Ənsədən başa yayılan “elektrik cərəyanı” kimi ağrı nəyin əlamətidir?

Bir çox insan başın arxa hissəsindən başlayaraq yuxarıya doğru yayılan kəskin ağrıları adi baş ağrısı və ya miqren hesab edir. Halbuki bu cür şikayətlər bəzi hallarda nevroloji mənşəli fərqli bir problemin – ənsə nevralgiyasının (oksipital nevralgiya) əlaməti ola bilər.

Citypost.az xəbər verir ki, nevroloqların sözlərinə görə, bu vəziyyətdə problem beynin özündə deyil, başın arxa hissəsini hissiyyatla təmin edən oksipital sinirlərin qıcıqlanması, iltihablaşması və ya sıxılması ilə bağlı olur.

Nəticədə xəstələr boyundan başlayaraq ənsəyə, oradan isə başın təpə hissəsinə, bəzi hallarda isə göz arxasına qədər yayılan ağrılardan şikayət edirlər.

Mütəxəssislər bildirirlər ki, ənsə nevralgiyası zamanı ağrı adi baş ağrısından fərqli xarakter daşıyır. Xəstələr ağrını çox vaxt “elektrik cərəyanı vururmuş kimi”, “yanıcı”, “deşici” və ya “sancıcı” hiss kimi təsvir edirlər. Ağrı qəfil başlayıb qısa müddətli tutmalar şəklində ola bildiyi kimi, bəzi hallarda daha uzunmüddətli və davamlı xarakter də daşıya bilər.

Bu problemin diqqətçəkən xüsusiyyətlərindən biri də gündəlik hərəkətlər zamanı ağrının güclənməsidir. Belə ki, saç daramaq, başı yastığa qoymaq, boynu çevirmək, uzun müddət eyni vəziyyətdə oturmaq və hətta baş dərisinə toxunmaq belə ağrının artmasına səbəb ola bilər. Bəzi xəstələr başın arxa hissəsində toxunmaya qarşı həssaslığın yarandığını da qeyd edirlər.

Nevroloqlar vurğulayırlar ki, ən çox rast gəlinən problemlərdən biri bu vəziyyətin miqren və ya gərginlik tipli baş ağrısı ilə qarışdırılmasıdır.

Nəticədə pasiyentlər aylarla, hətta illərlə düzgün olmayan müalicə ala bilirlər. Halbuki ənsə nevralgiyasında ağrının yaranma mexanizmi tamamilə fərqlidir.

Əgər miqren daha çox beyin damarları və sinir sisteminin müəyyən mexanizmləri ilə əlaqədardırsa, ənsə nevralgiyası periferik sinirlərin zədələnməsi və ya qıcıqlanması nəticəsində meydana çıxır. Bu səbəbdən də diaqnostika və müalicə yanaşmaları fərqli olur.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Mütəxəssislərin sözlərinə görə, problemin səbəbi boyun fəqərələrində degenerativ dəyişikliklər, osteoxondroz, travmalar, əzələ spazmları, uzun müddət düzgün olmayan vəziyyətdə işləmək və ya digər nevroloji amillərlə bağlı ola bilər. Buna görə də yalnız ağrıkəsici qəbul etməklə problemi tam həll etmək mümkün olmur.

Diaqnoz dəqiq müəyyənləşdirildikdən sonra müxtəlif müalicə üsullarından istifadə edilə bilər. Müalicəyə dərman terapiyası, fizioterapiya, xüsusi reabilitasiya proqramları və boyun əzələlərinin rahatlaşdırılmasına yönəlmiş metodlar daxil ola bilər. Daha mürəkkəb hallarda isə sinir blokadaları kimi müasir müdaxilə üsullarından istifadə olunur ki, bu da ağrının azalmasına və xəstənin həyat keyfiyyətinin yaxşılaşmasına kömək edir.

Nevroloqlar xəbərdarlıq edirlər ki, ənsədən başlayaraq başın yuxarı hissəsinə yayılan, elektrik cərəyanını xatırladan ağrılar müşahidə olunursa, bunu sadəcə yorğunluq və ya adi baş ağrısı kimi qiymətləndirmək düzgün deyil. Belə hallarda nevroloji müayinə vacibdir. Çünki əsas məqsəd yalnız ağrını azaltmaq deyil, onun yaranmasına səbəb olan problemi müəyyən edib aradan qaldırmaqdır. Bu isə vaxtında diaqnoz və düzgün müalicə ilə mümkündür.

Yusif