Sabiq deputat: Kitab mədəniyyəti məhv edilib

Təhsil eksperti, sabiq deputat Etibar Əliyev Milli Məclisdə keçirilən “Kitabxana sisteminin mövcud vəziyyəti və inkişaf perspektivləri” mövzusunda ictimai müzakirəyə münasibət bildirib.

Citypost.az xəbər verir ki, Etibar Əliyev sosial şəbəkə hesabında yazıb ki, tədbirdən yayılan fotolardan görünür ki, müzakirəyə kitab sahəsini bilən bir neçə nəfər dəvət olunub. O, Milli Məclisin Mədəniyyət Komitəsinin sədri Polad Bülbüloğlunun hansı inkişaf perspektivlərindən danışa biləcəyini sual edib.

Ekspert bu məqamda Mirzə Ələkbər Sabirin “Çatlayır, Xanbacı, qəmdən ürəyim” satirik şeirindəki “Biz olan evdə haçan vardı kitab?” misrasını xatırladaraq bildirib ki, Polad Bülbüloğlu və sabiq mədəniyyət naziri Əbülfəz Qarayevin rəhbərlik etdikləri dövrlərdə kitab mağazalarının, kitabxanaların və incəsənət ocaqlarının kütləvi bağlanması prosesi baş verib.

Etibar Əliyevin sözlərinə görə, sovet dövründə Bakıda təxminən 160 kitab mağazası və 60 kitab köşkü fəaliyyət göstərirdi. Hazırda isə paytaxtda fəaliyyət göstərən kitab mağazalarının sayı 8-10 arasında dəyişir. O qeyd edib ki, Sumqayıt və Gəncə kimi böyük şəhərlərdə də kitab mağazaları və kitabxanaların sayı ciddi şəkildə azalıb, rayon və kəndlərdə isə demək olar ki, kitab mağazaları qalmayıb.

Sabiq deputat vaxtilə fəaliyyət göstərmiş “Kitab passajı”, “Kitab evi” və Neftçilər prospektində yerləşən “Abunə” kitab mağazasının bağlandığını xatırladıb. O bildirib ki, “Azərkitab” Kitab-Ticarət Birliyinin də ləğv olunmasından sonra kitab mağazalarının sayı sürətlə azalmağa başlayıb.

Etibar Əliyev vurğulayıb ki, sovet dövründə, xüsusilə 1970-1980-ci illərdə Azərbaycanda kitabxana şəbəkəsi geniş olub. Onun sözlərinə görə, həmin illərdə ölkədə 4245 kütləvi kitabxana fəaliyyət göstərib, kitab fondlarında isə 38 milyondan çox nüsxə ədəbiyyat toplanıb. Həmin dövrdə kitabxanaların mərkəzləşdirilməsi aparılıb, kənd və qəsəbələrdə çoxlu sayda yeni kitabxana açılıb. O qeyd edib ki, təkcə 1969-1980-ci illərdə respublikada 1155 yeni kitabxana tikilib.

Ekspert bildirib ki, müstəqillik illərində, xüsusilə 1990-cı illərdən sonra kitabxanaların yerləşməsi yenidən nəzərdən keçirilib və bir sıra kitabxanalar bağlanıb. Hazırda ölkədə təxminən 2900 kütləvi kitabxana fəaliyyət göstərsə də, onların böyük əksəriyyətinin vəziyyəti qənaətbəxş deyil.

Həmçinin oxuyun

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Etibar Əliyev hesab edir ki, kitab mağazaları və kitabxanalar cəmiyyətin mədəni inkişaf səviyyəsinin göstəricilərindən biridir və bu sahədəki geriləmə ciddi narahatlıq doğurur.

Sabiq deputat paylaşımında mədəni irs nümunələrinin qorunması ilə bağlı məsələlərə də toxunub. O bildirib ki, vaxtilə Səttar Bəhlulzadə adına sərgi salonunun fəaliyyətinə son verilib, binadakı bəzi incəsənət nümunələrinin taleyi isə naməlum qalıb. Həmçinin “Səadət” sarayında aparılan təmir işləri zamanı tarixi bədii elementlərin zədələndiyini iddia edib.

Etibar Əliyev dünyanın bir çox ölkələrində yüzillərlə yaşı olan tarixi-mədəni abidələrin qorunduğunu xatırladaraq, Azərbaycanda da bu sahədə beynəlxalq təcrübədən istifadə edilməsinin vacibliyini vurğulayıb.

“Kitab mağazalarını və kitabxanaları bağladıqdan sonra mövcud vəziyyətlə bağlı narahatlıq ifadə etmək problemin həllinə xidmət etmir”, – deyə o qeyd edib.

Əli