Qaynananın adına keçirilən ev boşanmada kürəkənlə bölünürmü?

Boşanma proseslərində ən çox mübahisə doğuran məsələlərdən biri də nikah dövründə əldə edilən əmlakın necə bölünməsi ilə bağlıdır. Xüsusilə valideynlərin övladlarına aldıqları mənzilin hüquqi statusu ilə bağlı suallar tez-tez gündəmə gəlir. Bir çox hallarda vətəndaşları maraqlandıran əsas məsələ budur: nikah dövründə alınan, lakin sonradan valideynin adına rəsmiləşdirilən mənzil boşanma zamanı kürəkənin və ya gəlinin pay iddiasına səbəb ola bilərmi?

Citypost.az xəbər verir ki, hüquqşünasların bildirdiyinə görə, ilk növbədə əmlakın hansı əsasla əldə olunması və kimin adına rəsmiləşdirilməsi araşdırılmalıdır. Əgər mənzil son nəticədə valideynin adına qeydiyyata alınıb və çıxarış da onun adınadırsa, həmin şəxs əmlakın qanuni sahibi hesab olunur.

Mütəxəssislər qeyd edirlər ki, bağışlanmış əmlak ümumi qayda olaraq ər-arvadın birgə mülkiyyəti hesab edilmir və boşanma zamanı bölünmür. Yəni valideyn öz adına olan mənzili övladına və ya başqa şəxsə bağışlamayıbsa, həmin əmlak ailə üzvləri arasında bölünən əmlak hesab edilə bilməz.

Bununla yanaşı, hüquqşünaslar xatırladırlar ki, Azərbaycan Respublikası Konstitusiya Məhkəməsinin bu məsələ ilə bağlı hüquqi mövqeyi də mövcuddur. Həmin mövqeyə əsasən, əgər əmlak konkret olaraq ailəyə, yəni ər-arvada birlikdə hədiyyə olunubsa, müəyyən hallarda həmin əmlak birgə mülkiyyət kimi qiymətləndirilə və məhkəmə tərəfindən ayrıca araşdırıla bilər.

Lakin mənzil valideynin adına rəsmiləşdirilibsə və hüquqi sənədlərdə mülkiyyətçi kimi yalnız valideyn göstərilibsə, bu halda kürəkənin və ya gəlinin həmin əmlak üzərində pay hüququ yaranmır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Mütəxəssislər bildirirlər ki, belə hallarda boşanma zamanı həmin mənzil ümumiyyətlə ər-arvad arasında bölünəcək əmlak siyahısına daxil edilmir. Çünki əmlakın rəsmi sahibi üçüncü şəxs – valideyndir və onun mülkiyyət hüququ qanunla qorunur.

Hüquqşünaslar vətəndaşlara tövsiyə edirlər ki, gələcəkdə mübahisələrin qarşısını almaq üçün əmlakın alınması, bağışlanması və rəsmiləşdirilməsi zamanı bütün hüquqi prosedurlara düzgün əməl etsinlər və zərurət yarandıqda hüquqi məsləhət alsınlar. Bu, həm ailədaxili, həm də məhkəmə mübahisələrinin qarşısını almaqda mühüm rol oynayır.

Yusif