Diabetik ayaq – səssiz inkişaf edən təhlükəli fəsad  

Müasir dövrdə şəkərli diabetin yaratdığı ən ciddi problemlərdən biri diabetik ayaq sindromudur.

Citypost.az-ın məlumatına görə, mütəxəssislər bildirirlər ki, bu problem uzun müddət özünü ciddi şəkildə büruzə vermədən inkişaf edə bilir və məhz buna görə də “səssiz təhlükə” adlandırılır. Bir çox xəstə ayaqlarında yaranan ilk əlamətləri adi yorğunluq və ya yaşla əlaqəli dəyişiklik kimi qiymətləndirərək həkimə müraciəti gecikdirir. 

Halbuki vaxtında aşkarlanmayan diabetik ayaq ağır infeksiyalara, toxuma ölümünə və hətta amputasiyaya qədər gətirib çıxara bilər.

Həkimlərin sözlərinə görə, şəkər xəstələrinin müraciət etdiyi əsas şikayətlər arasında ayaqlarda keyimə, uyuşma, yanma hissi, iynə batırılması kimi narahatlıqlar xüsusi yer tutur. Bəzi xəstələr dabanlarında və ayaqaltında sanki od yanırmış kimi hiss etdiklərini bildirirlər. Bu əlamətlər xüsusilə gecə saatlarında və ya uzun müddət hərəkət etdikdən sonra daha qabarıq şəkildə özünü göstərir.

Diabet zamanı qanda şəkərin yüksək olması sinir uclarına və qan damarlarına zərər verir. Nəticədə ayaqlarda hissiyyat zəifləyir, qan dövranı pozulur və toxumaların qidalanması pisləşir. Belə olduqda ən kiçik zədə, cızıq və ya qabar belə ciddi problemə çevrilə bilər.

Təhlükəli məqam ondan ibarətdir ki, hissiyyatın azalması səbəbindən xəstə ayağında yaranmış yaradan və ya zədədən uzun müddət xəbərsiz qala bilər.

Mütəxəssislər qeyd edirlər ki, diabetik ayaq sindromunun ilk əlamətləri arasında ayaqlarda quruluq, dərinin çatlaması, rəng dəyişiklikləri, qırnaqlarda deformasiya və barmaqlar arasında sağalmayan yaraların yaranması da yer alır. Qan dövranının zəifləməsi nəticəsində yaranan bu yaralar bəzən aylarla sağalmır və infeksiyalaşaraq daha dərin toxumalara yayılır.

Həmçinin oxuyun

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Xüsusilə ayaq barmaqları arasında yaranan yaralar, qızartılar və irinli sahələr ciddi nəzarət tələb edir. Belə hallarda xəstələrin özbaşına müalicə aparması və ya problemin keçəcəyini gözləməsi düzgün deyil. Çünki infeksiya qısa müddətdə sümüyə qədər yayıla və ayağın itirilməsi ilə nəticələnə bilər.

Həkimlər vurğulayırlar ki, diabetik ayağın qarşısını almağın ən vacib yolu qan şəkərinin nəzarətdə saxlanılması və ayaqlara gündəlik qulluq edilməsidir. Şəkərli diabetdən əziyyət çəkən hər bir şəxs hər gün ayaqlarını diqqətlə yoxlamalı, dəridə hər hansı yara, çat, qızartı və ya şişkinlik olub-olmadığını izləməlidir. Ayaqların təmiz saxlanılması, rahat ayaqqabı seçilməsi və qırnaqların düzgün kəsilməsi də vacib profilaktik tədbirlər sırasındadır.

Mütəxəssislərin fikrincə, diabetik ayaq sindromunda erkən diaqnoz həyat qurtaran amildir. Xəstə ayaqlarında keyimə, yanma, uyuşma, iynəbatma hissi və ya sağalmayan yara müşahidə etdikdə vaxt itirmədən həkimə müraciət etməlidir. Çünki erkən mərhələdə başlanılan müalicə qan dövranının yaxşılaşdırılmasına, infeksiyanın qarşısının alınmasına və ayağın qorunmasına imkan verir.

Həkimlər bir daha xatırladırlar ki, diabetik ayaq sadəcə ayaq problemi deyil, şəkərli diabetin ən ağır fəsadlarından biridir. Vaxtında müraciət, düzgün müalicə və müntəzəm nəzarət sayəsində amputasiya riskini minimuma endirmək və xəstənin həyat keyfiyyətini qorumaq mümkündür.

Buna görə də şəkər xəstələri ayaqlarında yaranan heç bir dəyişikliyi kiçik problem hesab etməməli və sağlamlıqlarına xüsusi diqqətlə yanaşmalıdırlar.

Yeganə