Bu dünyada Hidayət Orucov yadigar qalsın  - Ramidə Yaqubqızı

Onun haqqında təsəvvürüm ağırtəbiətli, ötkəm və çətin ünsiyyət qurulacaq biri kimi formalaşmışdı. Ta ki, özü ilə tanış olana qədər. Bir görüşlə Hidayət Orucov haqqında olan düşüncələrim tamamilə dəyişdi. Bu böyük şəxsiyyət mənim təfəkkürümdə və təsəvvürümdə olduğu ciddiyyyətin içərisində yumşaq, həlim, xoşxasiyyət insan olaraq yaşadı. 

2023-cü ildə çalışdığım “Respublika” qəzetinin baş redaktoru Hümbət Musayevin tövsiyyəsilə bir neçə əməkdaş İrəvan Teatınının yaranma tarixi, inkişafı və keçdiyi yol barədə yazı hazırlamaq tapşırığı aldıq. Mövzunun genişliyi, mahiyyətinin çəkisi və şəxsi marağım o qədər böyük idi ki, qərara aldıq ki, vaxtı ilə teatra rəhbərlik etmiş və bu yolda yaranmış çətinliklərə baxmayaraq böyük uğurlar qazanmış  Hidayət Orucovla müsahibə alaq. 

Zəng vurub, özü ilə danışdıqdan sonra, təyin edilmiş vaxtda görüşdük. Açığını desəm çox həyəcanlı idim. Bir az da içimdə qorxu hissi var idi. Bilirdim ki, söhbətimiz alınacaq, amma onun haqqında illərlə yaranmış ciddiyyət məni qorxudurdu. Fikirləşirdim ki, nədənsə xoşu gəlməz, sərt reaksiya verər. Ancaq tamamilə əksinə oldu. Mənim bir az çəkindiyimi hiss edib: “Xanım qızım, heç nədən çəkinmə. Suallarınız çox maraqlıdır. Haradan götürmüsüz bu məlumatları?”. Bildirdim ki, Hidayət müəllim, sizinlə görüşə gələnə kimi haqqınızda çox şeylər oxumuşam. İmtahana hazırlaşan kimi gəlmişəm. Ürəkdən güldü. “ Heç adam da belə gözəl xanımla söhbətdən qaçar. Çox sağ ol qızım. Açığı, sizi görəndə karıxdım. Çox illər öncəyə qayıtdım”. Dediyinə görə, məni yaxını olan bir xanımın gəncliyinə bənzətmişdir. 

Müsahibə bitdikdən sonra mənimlə xeyli söhbət etdi. Kim olduğum, hansı bölgədə doğulduğum və ailə, övladlarımla maraqlandı. Cavablarım ona çox maraqlı gəlirdi. Sonda zarafatla qayıtdı ki, “Hə, day sənə xüsusi diqqət etməliyik. Qərbi Azərbaycanlıların gəlini olmaq asan məsələ deyil. Biz tərəflər gəlin istəyən olur”. Axırda da tapşırdı ki, yazı hazır olanda, mütləq gətir baxım. Beləcə də etdim. Bir neçə gündən sonra yenidən görüşdük. Təklif etdi ki, hazır müsahibəni mən oxuyum, O da qulaq asıb, məsləhətlərini versin. Oxuduqca düzəlişlərini edir və düzgün redaktənin çox əhəmiyyətli olduğunu bildirirdi. Mən isə onun hər sözünü yaddaşıma maqnit kimi çəkirdim. Oxuyub bitirəndən sonra qayıtdı ki, “Xanım qızım, səsinin ahəngi çox gözəldir”. “Təşəkkür edirəm Hidayət müəllim, bir tapşırığınız yoxdursa, gedim”. 

Bu görüş, təəssüratdan illər ötsə də yaddaşımda olduğu kimi də qalacaq. Bəzək-düzəksiz, səmimi, sadə. Onunla söhbətimiz böyük və əhatəli müsahibə şəklində “Respublika” qəzetinin tam bir səhifəsini təşkil etdi. Qəzet çapa gedəndən sonra zəng vurub mənə təşəkkür etdi. Bildirdi ki, “Xanım qızım, yaman maraqlı söhbət alınıb. Səni bilmirəm, mənə zəng vuranlar, fikir bildirənlər çoxdur”. Mən isə Ona belə maraqlı müsahibə verdiyinə görə təşəkkür etdim. 

2024-cü il iyul ayında Hidayət Orucovla yenidən görüşdük. Yenə “Respublika” qəzetinin baş redaktoru Hümbət Musayev məni çağırıb tapşırdı ki, Akademik Milli Dram Teatrında Hidayət Orucovun “İrəvanda yanan çıraq” adlı əsərinin premyerasıdır. Yaxşı bir yazı hazırlamaq lazımdır. Və bildirdi ki, xüsusi dəvətliyik. Deyilən vaxtda teatra getdik. Mövzu aktual olduğu qədər də canlı tarixi əks etdirirdi. Təəssüratlarım çox geniş idi. Yazını həmən yazıb, qəzetin səhərki nömrəsi üçün hazırladım. Tamaşa bitdikdən sonra yaxınlaşıb görüşdüm və xatirə şəkili çəkdirdim. Təşəkkürünü bildirdi. 

Olduqca diqqətcil olan Hidayət Orucov şəxsiyyətinin böyüklüyü özünü hər an büruzə verirdi. 20 Yanvar  hadisələri ilə bağlı yazı hazırlayırdım. Qərara aldım ki, nakam şair, gənc Ülvi Bünyadzadə ömrünə müraciət edim. Məqalədə Ülvinin ölümündən sonra şeirlər kitabının çap olunmasında Hidayət Orucovun göstərdiyi köməyə bir cümlə ilə toxunmuşdum. Qəzeti oxuyan kimi mənə zəng vurmuşdu. O yazdığım bir cümlə üçün dəfələrlə minnətdarlıq, təşəkkür aldım. Əlbəttə, bu, mənim üçün uğurdan da ötə bir şey idi. Ölçüyəgəlməz qiymət, diqqət və hörmətin əlaməti idi. 

Bu gün Hidayət Orucovun ölüm xəbərini aldım. Xeyli pəjmürdə oldum. İçimdə sonsuz minnətdarlıq hissi ilə yad etdim. “İrəvanda yanan çıraq” ümidi ilə yaşayan insan “Burdan min atlı keçdi” deyib, Vətən həsrətilə yaşayarkən, Vətəndən uzaqlarda əbədiyyətə qovuşdu. Mənə hədiyyə etdiyi kitabda yazdığı kimi bu dünyada Hidayət Orucov yadigar qalsın. 

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?