Bermud üçbucağının sirri açıldı? – Gəmi və təyyarələrin itməsinin elmi izahı

İllərdir sirli itkin düşmələrlə, yadplanetli iddiaları və paranormal nəzəriyyələrlə gündəmdən düşməyən Bermud üçbucağı, bəşəriyyətin ən böyük sirr mənbələrindən biri hesab olunurdu. Atlantik okeanının Mayami, Bermud adaları və Puerto-Riko arasında qalan bu sahəsində onlarca gəmi və təyyarənin izsiz-tozsuz yoxa çıxması müxtəlif əfsanələrin yaranmasına zəmin yaratmışdı. Lakin müasir okeanologiya, meteorologiya və dəniz geologiyası sahəsində çalışan alimlərin apardıqları son tədqiqatlar bu fantastik fərziyyələri birdəfəlik alt-üst edərək baş verənlərin tamamilə təbii və elmi izahını ortaya qoyur.

Citypost.az xəbər verir ki, gəmilərin qəfil okeanın dibinə batmasının arxasında duran ən vacib elmi faktorlardan biri dəniz dibindəki metan hidrat yataqları və bu qazın anidən püskürməsidir. Okean qatının altında sıxlaşan metan qazı böyük qabarcıqlar şəklində suyun səthinə qalxdıqda, suyun sıxlığını kəskin şəkildə aşağı salır. Nəticədə fizika qanunlarına əsasən, üzərində üzən gəmilər suyun qalxma qüvvəsini itirir və heç bir SOS siqnalı göndərməyə belə vaxt tapmadan saniyələr ərzində dibə batır. Eyni zamanda su səthinə çıxan bu metan qazı havadakı oksigenlə qarışaraq təyyarə mühərriklərində anidən alışmaya və ya mühərrikin dayanmasına səbəb ola bilər.

Meteoroloqların diqqət çəkdiyi digər həlledici amil isə regionda formalaşan heksaqonal (altıbucaqlı) buludlar və onların yaratdığı "hava bombaları"dır. Süni peyklər vasitəsilə aparılan müşahidələr göstərir ki, Bermud üçbucağı üzərində saatda sürəti 270 kilometrə çatan güclü küçə hava axınları formalaşır. Bu mikro-partlayışlar okean səthində hündürlüyü 15-20 metri keçən nəhəng, qəfil dalğalar (qatil dalğalar) yaradır. Nəhəng gəmiləri belə bir zərbə ilə iki yerə bölə bilən bu dalğalar və kəskin hava turbulansı təyyarələrin idarəetməni itirməsinin başlanğıc nöqtəsinə çevrilir.

ABŞ Sahil Mühafizəsi və ABŞ Milli Okean və Atmosfer Administrasiyası (NOAA) rəsmi olaraq bildirirlər ki, Bermud üçbucağında baş verən qəzaların faiz nisbəti dünyanın digər intensiv dəniz ticarət marşrutlarından heç də çox deyil. Həddindən artıq intensiv gəmi və təyyarə hərəkətinin olduğu bu zonada, dəyişkən tropik fırtınalar, Qolfstrim cərəyanının sürətli axını və insan faktoru birləşdikdə qəzaların baş verməsi qaçılmaz olur. Elm sübut edir ki, Bermud üçbucağında heç bir mistik və ya fövqəltəbii qüvvə yoxdur — hər şey təbiətin və fizikanın amansız qanunlarından ibarətdir.

Səkinə Yusifova/Citypost.az